Lu nhòquis de tantiflas (gnocchis de pommes de Terre)

Lu nhòquis de tantiflas

Per alestir de nhòquis de tantiflas aquò demanda una miej’oreta e 2 minutas de temps de cuecha quora l’aiga bulhe.

Per 4 personas : 4 a 5 tantiflas (circa 800 gramas), 100 gramas de farina, 3 òus, 50 gramas d’òli, sau, pebre, 50 gramas de parmesan gratat, sauça de dòba ò de tomatis.

Faire bulhir li tantiflas embé la pèu ò encara milhor, li faire cueire au forn. Li pelar encara caudi e ne’n faire de purea emb’una molineta. Mesclar la purea chèpa, l’òli e lu òus batuts. Metre après la farina e la sau e mesclar lo tot embé vigoria.

Sus la taula de la coïna enfarinada, pilhar la pasta qu’auretz facha e la partir en 5 tròç de 200 gramas cadun. Rotlar cada tròç per ne’n faire un bodinet lòng. Talhar emb’au cotèu per ne’n faire de morcèus de 2 centimètres cadun.

Faire rotlar cada morcèu sus li dents d’una forqueta emb’au det gròs per fins de lo regar.

En una granda casseròla, metre circa 3 litres d’aiga salada a bulhir. Fètz calar lu nhòquis en l’aiga bulhenta. Quora remonteràn a la surfaça seràn cuechs. Lu escolar embé l’escumoira e lu metre dins un plat. Lu condir embé la sauça cauda e un pauc de parmesan gratat.

Bòn apetit e bòn pron vos fague.

Aremerciam Mamet Denise per la sieu recèpta.