RIBON-RIBANHA

Dètz ans d’existença ja, avèm pas vist lo temps passar. Pura li chifras parlan da soleti. Dau bòn, fagueriam petar lo “boita-ofici” ! Embé 407 tèxtos inedits prepauats per 124 escritors diferents, avèm capitat d’interessar 51 780 lectors sus lo malhum, sensa comptar sus lu lectors dei libres Ribon-Ribanha e Ribon-Ribanha lo retorn. De mai, recevèm mantu pairinatges d’autors occitans de renom tanben coma de professors desirós de far conóisser la cronica ai escolans.

Avèm l’esper d’anar encà mai luenh ensems, de passar lu confins regionaus, durbent li nòstri colònas a toti li variantas de l’Occitan e, perseguent lo nòstre pantais perqué non, a toti li lengas dialectali de França !
Ribon-Ribanha si va arrestar dau temps dei vacanças per tornar au principi de setembre se lo volètz ben. Aquò depende de vautres toi amics e sòcis de l’IEO-06. Sensa de vautres la crònica vau ren.

Aquestu dètz ans de creacion de lònga an pas, de cen que sabèm, de parier. Alora si pensam de celebrar la lenga occitana e lu tèxtes vòstres de bèla maniera. De que ne’n pensatz ?

Vi remembratz que Ribon-Ribanha naissèt en lo 2008 dau temps dei castanhas, au mes de novembre.

Premier aremerciam mai que mai Anna-Maria MILARDI que siguèt a l’iniciativa d’aquesta crònica e que faguèt espelir Ribon-Ribanha.

Volèm pi festejar aquest anniversari en la vòstra companhia, vautres que dau principi e de lònga vi fagueriatz lu chantres de la cronica, en qualitat d’escritors, comentators, lectors, correctors, difusors, illustrators e mai lo resta…

Ne’n sauprèm de mai a la rentrada de setembre e vi direm quora e coma farem fèsta per lu dètz ans de Ribon-Ribanha.

D’aquí en là passatz un bòn estiu, denembratz pas d’escriure en lenga per lo vòstre grand plaser e lo nòstre.

Òsca en toi e viva Ribon-Ribanha !

Ribon-Ribanha, LO RETORN, 194 paginas 12 € + 4,20€ de pòrt)

Illustracion de cuberta : Verònica CHAMPOLLION