Minusculitats e autreis essencialitats

Entamenada

De bonurs simples e a gratis ! (1) (2)

Joan-Pèire SPIES President de l’IEO-06

1 Cen que trovèri a la lectura ! De fach, l’idea premiera mieua fuguèt d’escriure una entamenada minuscula. Drecha. Directa. Raubada. Achapada au vòl. Sensa detalh. Clara. Categorica. Simpla. Desfardada. Despuelhada. Poetica. Laugiera. Mistolina. Graciosa. Dubèrta. Emplida de sens. Perfecha. Absoluda. Luminosa. Armoniosa. Viva. Viventa. Pura. Definitiva. Cen que faguèri, sensa minga vergonha, premier de copiar un extrach dau libre, segond de faire lo marrit escolan fenhantàs que ne’n fa lo mens possible. Lu viatges que faguèri quora èri a seguir l’autor dins la sieu poesia de la vida, de cada tròç de vida, de cada briga de vida, lo vos pòdi afortir, es coma si durbir lu uelhs, si pilhar coma lo saup faire tant ben Magalí la plaça dau fotograf que nen mete en vista dins lo quadre li cauas que l’i passam cada jorn davant sensa li veire, sensa l’i prestar minga atencion, sensa s’enavisar que lu detalhs lu mai infims de la vida son lo tot premier de la vida que nen menan, senon a la saviesa, dau mens, e non es un pichin afaire, gràcias a l’umor fin de Magalí, a la reflexion, au soguinhe, au rire e per aquí a l’amor, la jòia, l’estrambòrd de la vida !

Siam urós de vi convidar an aquestu viatges au travès d’aquela publicacion novèla de IEO-06 edicions, que persegue lo sieu travalh d’edicion per mostrar la vitalitat de la creacion literària d’ancuei en occitan. E, fin finala, mi pensi aüra que mi siáu enganat bessai, que per vi convidar a v’endraiar dins lu pantais essencials de l’autor seria estat plus ben d’escriure una entamenada majuscula... per un libre majuscule. Tròup tardi.

2 A gratis de lònga un còup qu’avètz crompat lo libre, de segur !

Vos tendrem au fiu per saupre coma e dont lo crompar.