RIBON-RIBANHA

Alora mandatz sensa tardar lu vòstres tèxtes a l’adreça : ribonribanha@yahoo.fr

Pintura originala da : Maria OGGERO

[bleu marine]Format : 160 X 235 - Pàginas : 135 - Pretz de vèndita : 12 € + 2€ de participacion au mandadis[/bleu marine] .

Per ne’n revenir au libre, au principi de l’aventura voliavam publicar, ribon-ribanha, una crònica setmaniera utilizant per partida lu famós vers de Frederic Mistral dins « l’Espouscado » : « La gardaren riboun-ribagno, nosto rebello lengo d’O ! ». Aquò n’a donat de vòlha e l’idea dau titre.
L’aventura comencèt en novembre dau 2008 sus lo site de l’IEO-06 :
http://ieo06.free.fr, rubrica « Niçard-Patrimòni ».

Popularizar la lenga occitana dins la sieu diversitat d’aquí : niçard, provençau-maritime, mentonasc, vivaro-aupenc e mai lu parlar d’en Val Ròia : brigasc, saorgin... èra una premiera tòca. Èra finda, un biais de valorizar lo travalh d’escritura d’aquelu que, despí d’annadas, participan ai uech cors de lenga de l’IEO-06.

Avèm vorgut faire òbra collectiva e portar la nòstra pèira au clapier. Quaranta-doi autors diferents si son mandats a l’aiga. Ancuei vos prepauam la version papier dei cinquanta-cinc premiers tèxtes retenguts embé la sieu adaptacion francea. Si siam dich que toi aquestu tèxtes cortets porrion servir de lectura ò de document de travalh en aquelu que s’interessan a la lenga nòstra : pichoi e grands, escolans de collègis,
licèus, adults que trevan lu cors publics.

Aquest libre si vòu lo complement de « Ressons d’aquí », libre de crònicas
provençali, publicat da l’IEO-06 en octòbre dau 2006 e recampadi da Andrieu SAISSI (Ed. TAC Motifs des Régions).

Dins la totalitat, son sièis ans de crònicas setmanieri embé mai de setanta autors diferents, trenta mila lecturas sus lo site e gaire luenh d’un milierat de messatges mandats per escambiar, ajónher, precisar, encoratjar.

La nòstra lenga d’òc es sempre viva e cadun ne’n pòu èstre actor.
Avèm toi, tant que l’i siam, un dever de trasmission ai generacions futuri : en la familha, tra generacions, en lo quadre professional, en l’environament social.

D’associacions tanben, son presenti sus l’ensems de l’espaci occitan e vos pòdon ajudar en la sieu reconquista, basta lo voler.

L’IEO-06 e lu sieus sòcis son presents a Còntes, Drap, Grassa, La Còla (de Lop), Niça e Saorg, sensa exclusiva per tornar tèisser lo liame lingüistic e uman, la comunautat de lenga necessària au fonccionament d’una lenga. D’autres lo son a Canas, Coarasa, Gòrb, Mentan, eca...

L’occitan es un ben collectiu. Aregarda tant aquelu que lo parlan coma aquelu que lo desiran parlar. Es un ben immaterial que cau aparar. Lo monde es bèu perqué divèrs e la diversitat dau monde comença aquí, dont siam a viure.

Que mi sigue permés d’aremerciar en mai dei autors, Anna-Maria MILARDI, sòcia de l’IEO-06, cap-redactritz de Ribon-Ribanha, qu’òbra embé obstinacion e determinacion despí mai de tres ans sus lo site per faire viure aquesta crònica...

« La fé sens òbra, mòrta es ».

Per crompar lo libre basta lo nos faire saupre en bas d’article ò d’escriure a a l’adreça : ribonribanha@yahoo.fr. Per autre, n’aurem ai nòstri cors de lenga, serem presents a la fiera de Contes dissabta lo 8 de setembre. e au Festenau dau libre de Moans-Sartòu (5, 6, 7 d’octòbre), dont serà presentat lo nòstre libre Ribon-Ribanha de maniera oficiala lo diménegue 7 d’octòbre a miegjorn. Vos demandam en toi de reservar la vòstra jornada e de l’i èstre presents.

Denembratz pas d’anar de temps en autre veire sus YouTube : http://www.youtube.com/user/ieo06 que metrem en rega lu textes dichs dai autors ò per d’autres qu’auràn lo gentum de lu dire.

Joan-Pèire BAQUIÉ, President de l’IEO-06

An participat au comitat de lectura : Joan-Pèire BAQUIÉ, Maurici CASCIANI, Anna-Maria MILARDI, Frederic MARTRON, Carlòta RUBINI, Andrieu SAISSI, Joan-Pèire SPIES, Marc WALTZER.

Coordonator dau projèct : Joan-Pèire SPIES