Cronica de l’Agachaire

Lo 14 de julhet

D’aquela data tant importanta, ne’n podriáu faire un libre, ren qu’en me servent des archius de Forcauquier…

Citariáu d’abòrd nòstes promiers deputats, a començar per aqueu dau Terç Estat, Pèire-Francés-Bautesar Bocha. (Ei son cosin, Carle-Francés Bocha, deputat pereu en 1789, que faguet puei revirar e estampar en òc la Constitucion francesa.) Mai nòste Bocha, tre lo 10 de mai, escriu a Forcauquier per rendre còmpte de son mandat. Dins lo nombre de sei letras, ben entendut que i a son racònte dau 14 de julhet.

Apondriáu la celebracion dau 14 de julhet de 1790 a Forcauquier, que n’avèm lo rendut-còmpte detalhat. Debana, amb un gròs entosiasme patriotic e pron lirisme, aquela manifestacion tenguda a l’entorn d’un autar plantat sus lo Borguet. S’acaba a l’entorn de taulas e de cadieras, que tot lo monde sòrton per carriera, per beure a la santat dau rèi e de la causa publica…

Metriáu encara lo 14 de julhet de 1889, jorn (ben entendut chausit), que lo darrier dei Bocha faguet son testament. Entre autres disposicions, laissava a la vila 1200 francs, que ses interèsts èron per nòsta musica comunala. Cada annada deviá jogar a’n aquela data d’èrs nacionaus e, per cas que la Republica fuguèsse un còp de mai desvirada, joguèsse alora per nòsta fèsta nacionala de marchas funèbras…