Institut d’Estudis Occitans 06
Acuèlh dau sit > Provençau > Patrimòni > Cronicas de JJ de Niça

Enfança mautractada !

Cronicas de JJ de Niça

divendres 8 de novembre dau 2019, da Joan-Pèire

Resson dei imatges dau Blagaire de l’IEO-06 Jan-Jaume de Niça ven de nen mandar la sieu 29ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :

Enfança mautractada !

Se saup que son mai que d’un lei parents frustrats de n’èstre pas venguts dançarèla estèla
de la Ciamada, internacionau de fotbal sota lo malhot ai rais rojas e negres, medalha d’aur de saut de nièra, reina de la fava, caco de motò ò campion dau monde de pilo.

Lei vaquí que te mandan lo caganís dins la piscina olimpica avans qu’aguesse quitar lo sen de sa maire, t’emplisson lo biberon de creatina per lo far corre sus lei mans fins la taula dei pedaç, qu’avans que ten drech sus sei pès, lo pichon, te l’empègan sus un parèu d’esquis, que son a cridar un fais d’injúrias se lo fan d’arbitre sibla pas lo penalti quora lo sieu pichon fa morre bordon tot solet sus l’erbeta de plastic, siblan quora l’adversari es lèst de mandar la pichina bala jauna e, meme, que son a ment de gangassar la correctritz de Massena, qu’a pas donat, a la sieuna Alienòr, 21/20 per la dictada de l’IEO …

Alora coma volètz que siegue estonat quora vesi lei gents dau reire felen d’Aubèrt Raisner que faguon jogar lo pichin ninet … d’armonica cromatic …

Pasmens auretz totei notat que l’intrument que se vei aquí, es ben "melhorat". Dau temps qu’èran venduts sus lo baloard Jean Jaurès, per lo mai grand plaser dei galapians qu’èriam, leis instruments naturaus èran cafits d’un molonàs de granas negras que, sensa lo mendre repròche dei nòstrei gents, pòdiam, long dau camin, ESCUPIR …

JJ de Niça

SPIP | esqueleta | | Plan dau sit | Seguir la vida dau sit RSS 2.0 | {#ENV{label}}