Institut d’Estudis Occitans 06
Accueil > Provençau > Patrimòni > Cronica de l’Agachaire

Lo promier miracle

Cronica de l’Agachaire

dimanche 25 décembre 2016, par Jean-Yves ROYER, Marc

Vaquí la cronica setmanièra de l’Agachaire d’aquest diménegue (dimenge) dins "La Provence", edicion deis Aups. Per informacion, aquesta cronica comencèt, l’i a mai de dètz-e-nòu ans, lo 8 de junh de 1997. Òsca !

Cronicas, dau 25 de decembre de 2016 en lenga nòsta per l’Agachaire

Lo promier miracle

S’es escrich – e s’escriu encara – de molonàs de libres toquent les tradicions calendalas de Provença. Lei mai viventas de totes, a travèrs de totei ses transformacions. Ne’n naisson de nòvas, d’ancianas s’oblidon…
Un dei racòntes lei mai oblidats (emai fuguèsse lòngtemps estat celèbre dins tot lo monde crestian), es aqueste dau promier miracle que faguet Jèsus, a pron pena naissut. Nos es contat dins d’unes Evangèlis apocrifes que, coma l’òm saup, son d’eles que sòrte la pus gròssa part dau legendari crestian, mai que mai toquent les començaments de la vida de Jèsus e de son enfança.
Aqueste, de racònte, lo conoissèm aicí per una cançon reculhida en Provença Nauta per lo Manosquin Damàs Arbaud au mitan dau sègle XIX. Nos cònta que quand la Santa Vièrgi èra per s’acouchar e que, soleta aviá poscut se metre a la sosta, mandet sant Josèp per assajar de trobar quauqu’un que venguèsse li donar un pauc d’ajuda.
En s’entornent vèrs l’auberja onte les avián refusats, rescontret per camin una filha que li demandet son assisténcia. Mai aquela paura filha èra naissuda sensa braç ! Li anet pasmens e, en marchent, lei dos bras li venguèron, e ansin posquet ajudar… E, coma ditz la cançon a la fin : « Aquò’s lo promier miracle / Que Jèsus-Crist aguet fach, / Vièrgi Maria, / Que Jèsus-Crist aguet fach, / Jèsus, Marià ! »

Jean Yves ROYER

SPIP | squelette | | Plan du site | Suivre la vie du site RSS 2.0 | {#ENV{label}}