Institut d’Estudis Occitans 06Dissabta 23 de junh, si debanèt la fèsta de fin d’annada dau cors de lenga de Saorge bailejat dau nòstre sòci e amic, Jan-Piè AIPERTO. Eran presents en mai dei escolans lo cònsol de la comuna, Sénher Paul SILICI e una partida dau Burèu de l’IEO-06 : Carlòta RUBINI (segretairitz) e Joan-Pèire BAQUIE (President).
Après l’estudi d’un tèxto en saorgin e de dichas en lenga sota l’autoritat tota simpatica dau magistre Jan-Piè AIPERTO, lo president de l’IEO-06, diguèt la sieu jòia de si retrovar au mitan dei sòcis e tot l’interès que rapresentava l’aprentissatge d’aquest parlar original.
S’en seguèt un diaporama de presentacion de l’IEO-06 que donèt au monde presents una idea mai precisa de cen qu’es l’IEO : una associacion pan-occitana reconoissuda d’Utilitat Publica e agradada per la Joinessa e lu Espòrts en tant qu’associacion d’Educacion Populària. S’exprimèt tanben lo desideri dau nòstre Institut a sostenir dins la mesura dei sieu possibilitats toi lu parlars d’en Val Ròia en mai de l’Occitan.
Dissabta que ven, es a dire lo 30 de junh, toi lu escolans de Saorge, faràn un bilanç de l’annada escolara e prepauseràn d’accions de socializacion de la sieu lenga.
Auguram-li un bòn acamp. Vos tendrem au fiu dei sieu decisions.
RSS 2.0