ISTÒRIA DE GALÈRAS ANTIQUITAT - PROVENÇA / NIÇA / MAION DE SAVÒIA

" Li a totplen d’annadas d’aquò, mi venguèt en tèsta de faire paréisser un document pertocant l’istòria dei galèras, donat qu’aqueli fuguèron ligadi estrechament a l’istòria de Niça. Siguem clars : lo tèma faguèt negrejar de pàginas e de pàginas durant de sègles per lo biais d’òbras d’origina castelhana, italiana, francesa, anglesa, eca...mas minga escrich (a la mieu conoissença) en lenga noastra. Es aquela mancança que vouguèri, incomplidament, comolar. L’aventura s’entamenèt per lo passatge obligat dei cèrcas que demandèron mai de tres ans.

Bataille de Lépante, vue par Véronèse.

Ai intitolat lo memòri ISTÒRIA DE GALÈRAS ANTIQUITAT - PROVENÇA / NIÇA / MAION DE SAVÒIA.

Laissèri volontariament de caire lo reiaume de França, donat l’activitat reducha de la sieu marina de rems en Mediterrània, e presenta magerament sus lu teatres d’operacions maritimi sus la Mar Granda. Lo memòri es classificat coma seguisse :

AVANT-PREPAUS : Explicas dei mieus motivacions.

ENTAMENADA : m’entreteni de la causida de la lenga e de la grafia (paradigmas verbaus, sintaxi, eca...)

PART ISTORICA : element màger dau memòri enclausant l’Istòria dei galèras dins lo debanament dei sègles .

TERCENAU DE NIÇA

LA GALÈRA

ARMAS NAVALI E TACTICAS DE COMBAT DINS L’ANTIQUITAT

MARINARIAS E GALERIANS

BANDIERAS

SALUTS MARITIMES

ILLUSTRACIONS, MAPAS, DESSENHS COMPLEMENTARIS

CLAVADURA

QUAUCU TÈRMES NAUTICS ( per ajudar lu "terrencs")

QUAUCU PERSONATGES FAMÓS CITATS DINS LO MEMÒRI

BIBLIOGRAFIA

ENSENHADOR

ILLUSTRACIONS, MAPAS, DESSENHS, COMPLEMENTARIS

Aqueu memòri, foarça modèst a respièch d’òbras pareissudi dins lo passat, a minga pretencion d’èstre exaustiu, mas es redigit en lo noastre dialècte. Denembri pas de mercejar lo mieu amic arlatenc Felip Rigau, de la Comission Maritima de Provença, que mi porgissèt un fum de documents de que l’ajuda fuguèt capitala.

L’obratge representa quauqua ren coma 260 pàginas, tot enclaus, e mai de dètz annadas de trabalh."

Reinat.